Ang Florante ng Nueva Vizcaya
By: Harvey S. Keh, Abante
Nitong nakaraang linggo naimbitahan ang inyong lingkod kasama ang grupo naming Kaya Natin! sa isang forum kung saan tinatalakay ang mga kailangang hanapin sa mga kandidatong dapat nating suportahan at iboto sa nalalapit na halalan.
Noong nagkaroon na ng pagkakataong magtanong ang mga estudyanteng nanood ng nasabing forum, isa sa mga pinakamahahalagang katanungan ay kung posible pa bang manalo ang isang kandidatong marangal, mabuti at magaling kung siya ay wala namang pera.
Ang tugon ko rito ay OO! Marami ang nagsasabi na pera-pera ang laban sa eleksyon ngunit dapat tandaan ng mga kababayan na kapag binibili ang boto natin, sigurado namang babawiin ito kapag nahalal na ang kandidatong iyon sa puwesto. Nakita na natin sa Pampanga at Isabela na posibleng manalo ang mga kandidatong walang pera at makinarya kung sila ay tutulungan ng mga ordinaryong mamamayan.
Huwag nating kakalimutan na ang nakalaban ni Among Ed Panlilio sa Pampanga ay dalawa pa sa mga pinakamalalapit na kakampi ni Pangulong Gloria Macapagal-Arroyo habang ang tinalo naman ng dalawang beses ni Gov. Grace Padaca sa Isabela ay isang pamilyang namuno sa kanilang probinsya ng mahigit 45 taon na wala man lang nangyaring progreso sa kanilang lugar. Ang kanilang mga karanasan ang nag-udyok sa kanilang magtatag ng grupong Kaya Natin! kasama nila rito si Naga City Mayor Jesse Robredo na tinaguriang pinakamagaling na city mayor sa buong Pilipinas.
Nais nilang ipakita na kaya ng Pilipinong umangat at bumoto ng matitino at magagaling na lider sa ating pamahalaan. Hindi basta-basta pwede maging kasapi ng Kaya Natin! sapagkat kailangan dumaan sa isang masusing pagsusuri na ginagawa ng Ateneo School of Government. Kaya naman kahit maraming gustong sumali, 16 na mga lider sa ating pamahalaan lamang sa buong Pilipinas ang napapabilang at naimbitahan para maging isang Kaya Natin Champion.
Isa sa mga Kaya Natin Champions tulad ni Panlilio at Padaca ay si Mayor Florante Gerdan ng Sta. Fe, Nueva Vizcaya. Isang dating sundalo na nakapagtapos sa Royal Military College sa Australia.
Pagkaraan ng ilang taon ng paninilbihan sa AFP at sa iba’t ibang panig ng bansa ay nagdesisyong bumalik sa kanyang lalawigan upang magbigay serbisyo sa kanyang mga kababayan. Sa dalawang terminong paglilingkod ni Gerdan bilang mayor, naiangat niya ang antas ng edukasyon sa kanyang bayan kung saan mula sa average na 33% ang score ng mga kabataan ay umakyat na ito sa 66% sa loob lamang ng 5 taon at sabi nga ni Gerdan inaasahan niyang patuloy na aakyat ito at aabot na sa 75% ngayong taon.
Sa kanyang pamamalakad din nabigyan ng sistema ang lahat ng proseso sa munisipyo. Hindi na kailangang maghintay ng ilang oras or ilang araw ang mga nangangailangan ng mga permit o sebisyo dahil sa kanyang ipinatupad na Performance Management System.
Sa larangan naman ng kalusugan, pinarangalan din siya ng tanyag na Zuellig Family Foundation bilang isa sa mga lider na nagbibigay ng maayos at kalidad na serbisyong pangkalusugan sa kanyang mga nasasakupan.
Sa dami ng mga nagawa ni Gerdan nananatili pa ring payak at simple ang kanyang pamumuhay kaya naman pati na rin ang Asian Institute of Management (AIM) ay binigyan na rin siya ng parangal bilang isa sa mga Bridging Leaders ng ating bansa.
Masuwerte ang Nueva Vizcaya dahil may lider silang katulad ni Mayor Florante Gerdan, sana mas dumami pa ang mga lider na katulad niya na ang hangarin ay magbigay ng tamang serbisyo lamang sa mamamayang Pilipino at tuluyang sugpuin na ang kahirapan sa ating bayan.
***
Para sa inyong mga komento, mag-text sa 0919-9575444.
